5.09.2009

Kilama Receb Ûslî û Ayfera Delal


(Min ev kilam, di 10’ê Cotmeha sala 1999’an de avêtibû ser erdheja mezin a ku wê salê li Adapazari qewimîbû)

Hewar lêlê hewar lolo hewar lolo.
Li derûdora Marmarayê erd hejiyaye bi ser de lehî û tofan e. Bi deh hezaran meriv di bin xirbeyên mîrat de asê mane.
Sê şev û çar rojên reş-tarî di ser de çûne gazî û hewar û eman e.
Felek mala te xerab be, te Siloyê Gavan kir mîrê mîran qumandarê heft ordiyan e.
Ocaxa te kor be te Eco yê Kurikê Reş da ser serê pêncsed parlemanan e.
Qêrîn û gazî û hewarên zarokan gihîşte Îngilîstan û Aleman e.
Hela bala xwe bidê ti deng dernayê ji van marisên marisan e.
Hewar lêlê,  hewar lolo hewar lolo,
Hewar lêlê. hewar lolo, ez rebeno.
Ha hûûû...

Wetencahş Receb Ûslî ji nav enqazan serî rakiriye.
Hayê wî ji bayê felekê qe tunîne.
Ji wî trê ser wan de girtine neyarên Tirkiyê ye.
Berê xwe dide Ayferê, xanima malê ye.
Bala xwe didê ew di nav xwînê de digevize, nîvruhî ye.
Dibêje hêsîrê, rebenê, porkurê rabe mala me xera bûye. Pkk’ya bolucî nîvê şevê me bomberan kiriye.
Ez şahid im, min bi çavên serê xwe dîtiye.
Va ye guh bidê kerba wan bi bombeyan daneanîye.
Îja ji sibê de bi lom û çakûç û teviran pê ketine.
Dikin ew çend kêranên mayî jî ser me de bînin xwarê ye.
Ha hûûûû...

Ayferê serê xwe bi zorî rakir got lolo Recebo bextreşo wetencahşo
Çima naçî Koşka Çanqayayê gazî Silo û Ecewît nakî.
Çima general û amîralên me yên qehreman Ji bo operasyoneke taybet dawet nakî.
Çima ez dilegurê, lê îro çi bikim stûxwarê, bi dengê Hesenîkê min ê Mutlîcan dilşad û bextewar nakî.
Na na welle va ye ez dimirim Çima Şêx Fetulayê Gulen û Seydayê Zekeriya Beyaz û Yaşar Nûrî ji bo min li hespên boz û rehwan siwar nakî.
Naynî ser cinazê Ayfer Xanima xwe ya delalî Wê bi telqîn û diayê wan bimbarekan ber bi bihûştê ve birê nakî.
Hewar lolo hewar lêlê, hewar lêlê,
Hewar lolo hewar lêlê ez rebenê...

Watancaş Ûslî serê xwe ji bin enqazan rakiriye.
Bala xwe didê bajar serobino tev xerabe ye.
Guhê xwe dide radyona xwe ya TRT ê sipîkerê bêyom dibêje şer nîne, erd e.
Ji bextê wan re nîvê şevê tu dibê hêlekan e hejiya ye.
Heyfa wî nayê bi Ayfera wî ya delalî.
Heyfa wî tê dewleta qehreman di xewa şêrîn û şerîf de mayi ye.
Ha hûûûû...

Receb dibêje Ayfer delal werê destê xwe bide destê min qedera me mirin be jî bi hev re ye
Em ê lêxin herin tirba Mistefa Kemal li Enqereyê ye. Anitkabîra rengîn pir zexm û qewî ye ji serî heta binî ji hesin û çîmento ye.
Heştê salên cumhûriyetê ye tu kesî bînayek bi vî rengî nedîtiye.
Bi sê telaqan hêviya xelsbûnê dîsa di siya miriyan de ye. Hewar lêlê hewar lolo hewar lolo
Hewar lêlê hewar lolo ez rebeno Recebo.

Telewîzyonan anons kir bi bîst û sê qanalan.
Dibêjin rê girtîne, pir hilweşiyane li her aliyan Dozer û makîne çûne hewara general û amîralan.
Ji Receb Ûsli û Ayfera Delalî re mane rêyên goristanan.
Ha hûûû...

Receb dibê Ayferê, xanima minê were em herin goristanê di biniya bajêr de ye
Em mezelên xwe bi xwe bikolin hê di me de parîkî can maye Ez sond bixwim bi serê Gazî mistefayê Kemal tu dizanî pir qehreman û zana ye.
Pêşî li me zivistan e berf û baran û sur û serma ye.
Birçîbûn û tazîbûn xelata ser de ye.
Em ê biqerisin bibin bêton bi navekî din çîmento ye
Tu dizanî ew di xaniyan de teberik e, di peykerên Ata de xizne ye
Xema min nîne bila bêjin Receb Ûslî kerekî ji derhanê bû
Bes bila nebêjin ew xwedî dewleteke xwedan heştsed hezar leşker bû
Dîsa jî bi hesreta kerîkî nan û nivînek li koşekî nexweşxanê çû...
Ha hûûû...
Ez vî kilamî yadîgarî dengbêj Zulkîfê Qado yê Tatosê dikim.

Padîşa û Kîrkor Hoste

Pdîşayê Osmanî Siltan Mehmet piştî dagirkirina Konstantînapolîsê (Stenbol) dixwaze mora xwe li bajêr bixe û wî veguherîne ji xwe re bike “Î...