Bêxwedîtiya Kurda û asîmîlasyaon

Kurd û dostên kurda asîmîlasyonê; lehiya ku kurda daye ber xwe û paxiş dike an qet nabînin an dibînin xwe kerr û lal dikin...Hin ji wan gava gotina asîmîlasyonê dibe, ji wan tirê asîmîlasyon bi tenê “kurdên ku ji welatên xwe derketine û belav belavî bûne ” dihelîne. Xwedê giravî, wek çareserî jî dibêjin; “bila kurd vegerin Kurdistanê” Disa bi ya wan; yên li Kurdistanê heta roja heşr û nîzamê wê kurd bimînin! Ew nizanin ku hema bêje li tevahiya bajarên Kurdistanê û li gelek navçe û gundên wê, êdî zimanê Kurdî li ber mirinê ye û dor hatiye gundên serê çiyayan... Ew nizanin ku Kurdistanekî bê kurdî êdî tu car ne Kurdistan e; wek îro ne bi derewkî, bi rastî û bi esayî “Dogû û guney dogû Anadolû”ye ! Hin kes jî dibêjin ew gelên asîmîlîye kirî hejmarkêm bûn; ji 100- 200 hezar peyayan pêkhatî bûn, lewma wenda bûn; kurd bi milyonan in, ew ê ku de herin, winda bin? Di hejmara 97’an a kovara zanistî ya navdar a Fransizan a bi navê “Maniere de Voir”ê de, Bernard Cassen ê êkolîner û nivîskar; edîtorê vê hejmara Kovarê- ligel van taybetmendiyên xwe ew yek ji serokên antî-globalîzmê ye - di gotara xwe ya bi sernavê “Cette arme de domination”ê de( ev çeka hukumdariyê) me bi rewşa xedar û xetereya ji binî ve paxişbûna zimanan - ên di bin nîrê mêtingehkaran de ne - dihesîne û wiha dibêje: “ Xurtbûn û di nav gel de belavbûna zimanekî, bûna wî ya xwedî qadekî serwer ne bi hejmara axafkêran; bi têkiliyên amûrên desthilatdariyê dibe. Kolonyalîst, bi fermanberan be( memûr), bi leşkeran be, bi kolonan be ( kesên bi destê mêtingehkaran di koloniyan de tên bicih kirin) bi mîsyoneran be tu car ji niştecihan ne zêdetir in; lê ew; çi ekonomîk, çi leşkerî çi sembolîk û psîkolojîk xwedî hemî hêz û derfetên welat in. Dîsa di heman kovarê de, fîlozofê herî navdar ê Fransizan Regis Debray, sedema bingehîn a “liserxwe mayîn û nemirin û adaptasyona bi cihana modern ve ya zimanên wek îbranî, macarî, fînî, Çekî” wek xwedîdewlet bûna wan û mudaxeleya dewletên wan nîşan dide. Ez ji dil û can ev nêrînên her dû zanistan jî erê dikim û dikim di warê “ kurdayetî û kurdiya reben a bê dewlet û bê desthiatdarî” de çend mînakên balkêş pêşkêşî we bikim û hûn bi xwe, bi çavên serê xwe bibînin kurdên bê dewlet û bê xwedî çawa dibişifin,dihelin û dibin çoyê destê xelkên xerîb... Ewilî em bi êlekî herî navdar a kurda destpêbikin: Rewadî... Sulhedînê me yê Eyûbî ji vî êlê ye ... Rewadiyan du dewlet ava kirine: Dewleta Eyûbiyan û Dewleta Şedadiyan. Ew tînin dewleta xwe ya Şedadî (951-1164) rasterast li ser axa azerbaycana îro saz dikin; azerbaycana ku şêniyên wê yên yekemîn ji çanda “Kûr-Araz” ên merivên hurîyan in û sê hezar sal beriya zayinê li vir dixûyên û bi nîjadkî digîhijin Huriyan ên pêşiyên kurda... Heta dawiya sedsala 11’an li Azerbaycanê çi bi navkî çi bi cankî tirk naxûyên û kurd li vir bi mîlyonan in û desthilatdar in. Bi ya “Tahir Silêman” ê Sernivîskarê Rojnameya “Dîplomat” a Komara Azerbaycanê di sala 1930’î de li vî welati 130.000 kes xewe wekî kurd dide nivîsandin... Lê heyfa wana ye ku ew jî wek pêşiyê xwe yên “bêdewlet û bê xwedî” bi girsehî asîmîliye dibin û îro ji wan li serhev 13.000 kurd ên jihev belavbelav bûyî mane; dora asîmîlasyonê ya wan e. Ka yên din ku de çûne? Ebul Feyz Elçîbey ê li wir ketibû dilqê “gurê-boz” ne cehşê me be? Pîr Dîma yê kurdekî êzidî û serokê Yekîtiya Rewşenbîrên Kurd yên Gurcistanê ye, bi me dide zanîn ku hemî kurdên kafkasan ber bi asîmîlasyonê ve dibezin û yên kurdî dizanin û li kurdayetiya xwe xwedî derdikevin roj bi roj kêm dibin û malbat êdî navên kurdî li zarokên xwe nakin. Pîr Dîma dibêje ; “ jixwe navê min bixwe jî ne kurdî ye!”(bnr: nefel.com) Seidê Kurdî di parêznameya xwe ya bi navê “ Cinayet a 3’emîn a li Dadgeh a Îdareya Orfî” de dibêje “...di 1908’an de li Stenbolê 20.000 hemwelatiyên min ên hemal ên ji dilê xwe sax û saf û nezan hebûn...” ( Seidê Kurdî di sala 1908’an de bi mabesta birêxistinkirina hemalên kurd-bona ku ew serpûşê bi navê kalpak tê zanîn û ji avusturyaya ku dijberiya Osmaniyan dike tên kirîn boykot bikin; nedin serê xwe - gelek serî diêşîne, bi wan re tê cem hev û şîretan liwan dike) 20.000 mêrên gir ên geriyayî; tevî zar û zêrç, kofî û kulfet dike 100.000 can! Di ser de 100 sal derbasbûn. Hesabdarno, de ka bijmêrin heta niha ji pişta wan çiqas mirov lihev zêde bûne? Ew tu car venegeriyan “Bedlîsa şewitî” û hê îro jî li “Stembol a rengîn” de bi cih û war, bi koşk û seray in... Ji wan çend kes ji kurd û Kurdistanê hayîdar in? Ew jî bimîne li alîkî; gelo bi hebûna “hemwelatiyên xwe yên van salên dawî ji axa bav û kalan koç kirine û varoşên wan şên dikin û hê jî bi kurdayetiyê ve girêdayî ne,” bextewar in? Gelo ew general û siyasetmedar û karsaz û bûrokratên koka me tînin, aca me diqelînin, ûrtê me kor dikin ne ew bin? Piştî Serhildana Dêrsimê kurd bi hezaran hatin kuştin, bi deh hezaran hatin koçberkirin. Ew mal bi mal ji hev hatin veqetandin û li gund û bajarên Anatoliyê hatin bicîhkirin. Îro ew bi gelemperî ji neseb û ziman bûne û xwe bi çanda tirkî û bi elewîtiyek kedîkirî girêdane... Wek nimûne; ên çûne Bodrumê dizanin; li teniştê gundekî tûrîstîk ê bi navê “ Gûvercînlîk” heye. Şêniyên wê bi esilkî Dêrsimî ne. Çend sal berê, ez 10-15 roj liwir mam û min bi çend camêran re hevaltî danî... Min çiqas behsa kurda dikir, ew bi tirkiya xwe ya bi devoka Egeyê li min dizivirandin û digotin; “ Serê me êşiya sadiç, em reyên xwe didin CHP’ê ma ne bes e... Êdî tu ji me doza çi dikî? Tu dikî em jî bibin terorîst!” Gundekî bi navê “Mûtevellî” heye li herêma Ege yê . Ev gundê “gurr û şên ê bi şaredarî” li ser navçeya “Sarûhanli” ya Manîsayê ye. Gundî ji sedî 70 Kurd in; kurdê Serhildana Agirî yê... Şaredar jî ji wan e... Xeynî kal û pîr ên wan ên êdî li benda mirinê ne tu yek kurdî nizane, xwe li kurdî nake xwedî! Bi salan e li dûv qwîna Erbakan û Turkeş bûn; niha murîdên Erdogan in... Jiber ku cih teng e dor nehat Cuneyt Zapsu yê Tayîpperest ê kurê evdirehîm ê bona kurda kezebreşî bû mir... Dor nehat Cemal Kûtay ê bav û kalên wî yên “Bedirxanî” bi hesreta welat çûn ser heqiyê, lê ewî xwe li ser Ataturk merezdarî kir û bi wê kulê mir... Bedrettîn Dalanê “Şêxbizinî”, Şêx(!) Kamûran Înanê Bedlisî, êdî nizam kî û kî... Di vê nivîsê de min kir -herçiqas kin û lawaz be jî – kronolojiya asîmîlasyonê raxim li ber çavên we yên reş-belek... Min rastiya îro neanî ser ziman. Yên dixwazin rewşa îro bikolînin divê kaxiz pênûs bidin destan, bikevin nav malên kurda, ewilî pirs bikin ji yên 70-100 sliyan; ka ji wan çend kes hene tirkî nas... Paşê dor bînin yên 0- 15 saliyan, bi çavên serê xwe bibînin rewşa me ya malwêran. Mamoste Marûf

Yorumlar